Davao City – Patay ang usa ka 30 anyos nga lalaki human matud pa nalumos kagahapon sa sapa sa may Phase 5 El Rio Village Brgy 19- B siyudad sa Davao.
Sa gihimong pakighinabi sa News Team sa DXDC RMN Davao ngadto kang Jun-jun Edo, silingan sa biktima, ang maong biktima giila nga si Pj Bajada, usa ka driver nga taga Bankerohan ning dakbayan.
Matud pa ni Edo, pasado alas 10:00 sa buntag kagahapon ang biktima nitabok sa sapa kauban sa duha niya ka barkada nga sila alyas Taloy ug alyas Adong aron sa pagkuha og dabong sa tabok sa sapa.
Dihang nakauna na ug labang ang iyang barkada nisunod ang biktima apan pag-abot sa tunga sa sapa nangayo na kini og tabang sa iyang kauban.
Gisuway pa og rescue ni Taloy ang biktima apan gigakus kini hinungdan nga gipaak ni Taloy si Bajada tungod matod pa niini kung wala niya kini gibuhat hayan duha sila ang malumos niadtong tungora.
Napalgan nalang ang lawas sa biktima nga nag-utaw utaw didto sa Phase 1 sakop sa nahisgutang barangay.
Ang patayng lawas sa biktima anaa na sa Angel Funeral Home ning dakbayan sa Davao.
Radyoman Don Pulayao
