Nakilala na ang bangkay sang lalaki nga nasapwan kahapon sang kaagahon sa kilid sang dalan sa Sitio Tabay, barangay Lanipe, Nueva Valencia, Guimaras.
Suno kay Police Captain Henry Gardone sang Nueva Valencia PNP, ginkilala ang biktima nga si Romar Ordiales, 31 anyos sang Bo. Obrero, Lapuz, Iloilo City.
Alas 5:30 kahapon sang kaagahon sang masapwan ang bangkay ni Ordiales nga may pilas tuga sang pagpangluthang.
Base sa imbestigasyon sang kapulisan, gin-pick up ang biktima sang wala makilala nga mga suspek sa Jordan, Guimaras samtang nagalagaw-lagaw ini sa Manggahan Festival upod sa iya pakaisa.
Pagka-aga, nasapwan na lamang ang bangkay sini sa kilid sang dalan sa Barangay Lanipe , Nueva Valencia, Guimaras kag gositibo ini nga ginkilala sang iya utod.
Padayon pa ang imbestigasyon sang kapulisan sa nasambit nga insidente.
