General Santos city—Doble ang kasong atubangon sa usa ka lalaki nga nagmaoy human kining nakuhaan ug marijuana.
Giila ang suspek nga si Reynaldo Vivas, legal age, residenti sa Purok 3, Lanton, Barangay Apopong, Gensan.
Sa report sa Police Station 2 nasuta nga una nang gireklamo ang suspek sa iyang ugangan nga si Elmer Flores, legal age, residenti sa Purok 4, Lanton, Apopong human siyang gimauyan sa suspek.
Una nang naglalis matud pa ang duruha, milakaw ang suspek dayon naghubog. Pagbalik niini didto na niini gisulong ang iyang ugangan dayon gibaharan nga patyon, tungod niini siya gipadakop aron nga ikustudiya sa kapulisan gumikan sa tumang kahubog.
Samtang anaa kini sa Police Station 2, namatikdan sa kapulisan nga daw sama sa dili mahimutang ang suspek ug didto naaktuhan ang paglabay niini ug usa ka pakete nga pinaugang dahon sa marijuana.
Tungod niini, gawas sa pagmaoy, pasakaan usab ug kasong kalapasan sa RA 9165 ang nasangpit nga suspetsado.
