Lalaking may deperensya sa pangisip naghuremintado, gipusil sa pulis

General Santos City—Samad sa iyang paa ang naangkon sa usa ka lalaking may deperensya sa iyang pangisip didto mismo sa ilang lugar sa Purok Pitoho, Barangay Bawing, alas 11:00 ang takna kagahapong adlawa.

Giila ang nasangpit nga si Jhon Carlo malinson, 23 anyos, residenti sa nasampit nga lugar.

Subay sa tala sa Police Station 5 nasuta nga nanghasi matud pa ang nasangpit didto sa ilang lugar diin nagkuha kini ug sundang dayon nagsigi ug panghadlok sa mga silingan nga manigbas.


Tungod niini nangayog tabang ang inahan sa nasangpit ngadto sa mga Barangay Tanod aron unta kuhaon ang gihuptan niining sundang gumikan sa kahadlok nga basin ug dunay matigbasan apan wala gyud patuo ang nahisgutan mao nga nangayo na silang tabang sa pulis.

Tungod wala gyud nikalma si Malinson, napugos ang kapulisan nga kini pusilon sa iyang paa subay na usab sa pagtugot gikan mismo sa inahan sa nasangpit.

Dali man usab nga gidala sa ospital si Malinson ug kasamtangan na karon nga nagpaalim sa iyang samad nga naangkon. Sumala sa inahan nga posibling nalipasan na usab ug gutom ang iyang anak mao nga naghurimintado.

Facebook Comments