Land conflict rason sa insidente sang pagpangluthang sa Brgy. New Pangasinan, Koronadal City nga ginkapatay sang 2 ka persona.

Duha patay kag isa ang pilason sa nagluntad nga pagpangluthang sa Purok Camia, Brgy New Pangasinan, Koronadal City, pasado alas 2:00 sang hapon, kahapon nga adlaw.
Ginkilala ang mga ginbawian sang kabuhi kanday Elves Agsaluna Castillo alias Boyet, isa sa suspek sa insidente nga dead on the spot, single kag residente sang Brgy Dumadalig, Tantangan, South Cotabato, samtang dead on arrival sa ospital ang biktima nga si Vicente Viajedor Sumigcay, 38 years old kag residente sang Purok Camia, Brgy New Pangasinan, Koronadal City.
Gindala naman sa ospital ang isa pa ka suspek nga ginkilala kay Renel Briones Fuyunan, 41 years old, businessman kag residente sang Norala, South Cotabato nga nakaangkon sang anum ka gunshot wounds sa mga nagkalain-lain nga parte sang iya nga lawas.
Base sa imbestigasyon sang Koronadal CPS, land conflict ang motibo sa nasambit nga insidente, matapos nga ang lupa sang biktima ang ginbakal suno pa sang suspek nga si Fuyunan, apang napaslawan nga sundon ang ila kasugtanan rason nga ginbawi ukon wala gindayon sang biktima ang transaksyon.
Sa subong padayon ang imbestigasyon sang Koronadal CPS sa insidente.




Facebook Comments