LAPSAG NGA NASULOD SA PLASTIC BAG, GINBILIN SA GUWA SANG GATE SANG ISA KA BALAY SA CALUMPANG, MOLO

Ginbilin sang wala makilala nga iloy ang iya bag-o bun-ag nga lapsag sa guwa sang gate sang isa ka balay sa Holy Family Subdivison, Zone 8 Calumpang, Molo, alas 9:30 kaina sang aga.

Suno kay Kurt Jee, nakita ni alyas Ayeng, manugpaninlo sa amo nga lugar ang plastic nga nakabugkos kag nagla-um ini nga may unod nga patay nga ido ukon kuring.

Apang sang ginlantaw ni Ayeng, nakibot ini nga lapsag nga lalaki nga bag-ong bun-ag ang sulod nga naputos sa lampin kag ara pa ang pusod kag inunlan.


Dugang pa ni Kurt, gilayon sila gintawag sang manugpaninlo bangud sa guwa lamang sang ila balay nakita ang lapsag.

Ginpakamaayo ni Kurt nga dal-on ang lapsag sa health center para matinlu-an kag ginpabayo-an antes dal-on sa Western Visayas Medical Center.

Ginpahayag ni Ayeng nga isa ka babaye nga nakauniporme sang puti kag may lutak ang tiil ang nakita sini nga nagabalik-balik sa lugar antes nakita ang bata.

Igatugyan na lamang sang pamilya ni Kurt sa Dept. of Social Welfare Devt. Office ukon DSWD ang disposisyon sa bata apang kun hatagan sang higayon, handa man ang ila pamilya nga adoptahon na lamang ini.

Samtang, lantawon sang Molo PNP ang cctv footage sang subdivision agud makilala kun sin-o ang nagbilin sa bata.

Ano ayhan ang rason nga ginbilin sang iloy ang iya lapsag?

Facebook Comments