Tiene ahora nuevo modus ta conduci el maga ladron donde ta hace estos victima con el maga mujer pasajero na maga PUJs pormedio ta escupi anay antede ruba con el diila maga portamoneda.
Del Domingo dos maga incidente el ya sale reportao na Divisoria Police Station donde maga victima ambos maga mujer.
Na report di Supt. Mark Azur el jefe del mencionao estacion ta aparese el dos separao incidente ya sosede abordo na dos PUJ donde el primero alas once pasada del dia cuando el mujer pasajero muntao este na un PUJ estaba na costa este donde ya abaja este na Guiwan.
Aqui ya descubri le nohay mas su portamoneda na su shoulder bag.
Pero ya acorda el victima mientras muntao le na PUJ tiene dos hombre pasajero el ya informa conele que tiene asegun laway na bag donde dayun le ya limpia con este pero sin saber disuyu aquel tambien el tiempo donde el mismo dos persona amo ya man cuut consu portamoneda.
Pasada ala una del tarde otro tamen mujer quien junto consu anac ya munta desde na Guiwan para na Divisoria donde semejante tiene dos hombre pasajero el ya informa conele que tiene asegun laway el cabesa del su anac.
Ya limpia tambien este con el laway y cuando ya abaja sila na vejiculo perdido ya tambien su portamoneda.
