LGU New Bataan, hapsay ang relief distribution sa quake victims

Davao City – Wala nagbaton og problema ang Local Government Unit (LGU) New Bataan, Davao de Oro, sa pag-distribute og ayuda sa mga nabiktima sa linog sa maong munisipalidad.

Sa interbyu sa DXDC RMN Davao kang Lynne Dollolasa, Municipal Disaster Risk Reduction and Management (MDRRM) Officer sa LGU New Bataan, gisulti niini nga adunay mga pribadong sector nga direktang naga-adto sa lungsod ug aduna nay target nga mga benepisyaryo.

Giklaro ni Dollolasa nga walay problema kung direktang makigkoordinar kanila ang mga mag-donate, subay sa balaod partikular na sa Republic Act 10121.

“Kami kay nag-declare man mi’g under State of Calamity, so kung naay modirekta diri sa amoa (sa ilang donasyon), among ginadawat. Pero gina-report namo para maapil pud sa general nga report sa probinsya kung unsa ‘tong mga nag-donate nga agencies o organizations diri sa among lungsod,” tataw sa MDRRM Official.

Sa pagkakaron, nagpabiling anaa sa evacuation camps ang 409 ka pamilya o 1,522 ka indibidwal human nga nadamyos ang ilang mga pinuy-anan sa sunod-sunod nga linog, kung asa nahimong epicenter ang lungsod sa magnitude 6.0 nga linog niadtong Pebrero 1 ug magnitude 5.9 niadtong Marso 7, 2023.

RadyoMaN Kirby Manzon

Facebook Comments