SAN CARLOS CITY, NEGROS OCCIDENTAL – Padayon ang imbestigasyon sang mga pulis sa kaso angut sa pagpatay sa lider sang Muslim community sa sulod mismo sang iya balay sa syudad sang San Carlos, Negros Occidental.
Suno sa San Carlos City Police Station, duha ka suspek ang nagtiro kay Abdul Mangontawar, 51 anyos, residente sang Barangay 5 sang amo nga syudad, kagapon sang hapon, Pebrero 21.
Pahayag sang mga nakasaksi, sakay sang motorsiklo ang mga suspek tubtob nga nakasulod sa balay sang biktima kag gintiro sang makapila ka beses.
Igo sa ulo kag iban pa nga bahin sang lawas ang naagum ni Mangontawar rason nga ginbawian ini sang kabuhi. Narekober sa crime scene ang pulo ka empty shells sang .45 caliber pistol.
Padayon pa ang imbestigasyon sang kapulisan kun ano ang motibo sang krimen. /rcsg
