Nasikop sa Philippine Drug Enforcement Agency kon P-DEA Reg. 10 ang lima ka lalaki sa dihang gisilbi ang search warrant batok sa ikapito sa drug watchlist sa PDEA sa Misamis Oriental. Matud ni PDEA Agent Ben Calibre nga target sa search warrant si Ian Putotan sa may Gomez, Sta. Cruz, Tagoloan, Misamis Oriental. Atol sa pagserve sa warrant nasikop usab ang laing upat ka lalaking naa sulod sa drug den nga sila Reynold Velasquez, Jeremy Nicom, Fernando Domo ug Robert Gotong.
Nakuha atol sa operasyon kagahapong adlawa ang 50 gramos kapin kon kulang nga sachet sa shabu nga gibana-banang nagbalor sa 100-thousand ngadto na sa P120,000.00. Gidugang ni Calibre, dugay na nilang gipaubos sa surveillance si Putotan ug ilado kini sa Gomez, Sta. Cruz, Tagoloan, Misamis Oriental nga tigpayuhot ug tiggamitan sa ginadiling druga, gawas sa pagmintinar niini og drug den.
