Lima ka tawo ang pilason matapos madisgrasya ang ila ginasakyan nga Sportivo sa Baranggay Rizal Tuguisan Guimbal Iloilo nga nakabunggo sa railings sa dalan.
Ginkilala ang mga biktima nga sanday Jessie Tanalgo sang Poblacion Tubungan, Driver sang Sportivo nga nakaangkon sang fracture sa natuo nga abaga; Patrick Elejio Flor, 19 anyos sang Cayap Igbaras, may mga pilas sa kamut kag tiil; Jose Maria Rafael Espinosa, 58 anyos sang Barangay 5 Igbaras nga may pilsa sa guya; Jovie Paniza, 26 anyos sang Igpaho Tubungan nga may gamay nga pilas sa ulo kag Danny Eslabra legal sang pang-edaron sang Rizal Guimbal Iloilo nga fracture ang tuo nga abaga.
Ginpahayag nga halin sa banwa sang Guimbal kag pudulong sa Siudad sang Iloilo ang mga biktima sakay sa Isuzu Sportivo sang nadulaan sang kontrol ang driver pag abot sa kurbada nga dalan lapit sa Racsos Woodland Resort sa Baranggay Rizal Tuguisan Guimbal.
Madasig naman nga nagresponder ang LGU-Responders kag Guimbal BFP kag ginpangdala sa ospital ang mga biktima nga gilayon man nga ginhatagan sang nagakaigo nga pagbulong.
