Davao City – Misaka na sa upat ang natalang patay human nabiktima sa epekto sa kusog nga linog sa Magsaysay, Davao del Sur.
Sumala ni Anthony Allada, information office sa Magsaysay local government, unom ka adlaw human sa pagtay-ug sa magnitude 6.3 nga linog, mipanaw kagabii ang usa ka biktima nga giila nga si Rosita Botilla Quilla, taga Purok 12, Poblacion sa nasangpit nga probinsya samtang kini nagpaalim sa balay-tambalanan human matud pa kini naigo sa nahulog nga hollowblock.
Dugang pa nga gidala si Quilla sa pinakaduol nga ospital sa Bansalan ug Digos City apan gidala kini sa Southern Philippines Medical Center diin unom ka adlaw nagpatamabal ang biktima apan nakabsan kini sa kinabuhi.
Samtang, nagpabilin sa gihapon sa evacuation area sa Davao del Sur ang kapin 200 ka mga pamilya.
Matud sa Local Government Unit o LGU, wala usa tugti ang mga residente nga mubalik sa ilang kabalayan gumikan dili pa kini luwas nga puy-an.
Hinuon natunolan na usab og cash assistance ang mga pamilya nga nadamyos ang mga balay isip parte sa Emergency Housing Assistance Program sa National Housing Authority.
RadyoMaN Renz Barbarona
