Inilabas ng Department of Health (DOH) ang listahan ng alternatibo at ligtas na paraan ng pagdiriwang ng Pasko at pagsalubong sa Bagong Taon.
Inisa-isa ni Health Undersecretary Myrna Cabotaje ang iba’t ibang paraan para makaiwas pa rin sa sakit na dala ng COVID-19 habang masayang ipinagdiriwang ang mga nasabing holiday.
Kabilang sa mga ito ang:
– Pagpalo sa tambol
– Pagbusina
– Pagpapa-ilaw ng glowsticks
– Pagpukpok ng kaldero
– Pag-alog ng alkansya
– Pagkumpas ng tambourine
– At pagpapatugtog ng malakas
Maliban dito, hinikayat din ni Cabotaje ang publiko na magsuot pa rin ng face mask habang nagsasaya ngayong kapaskuhan.
Samantala, ipinagbabawal ng DOH ang paggamit ng torotot o pito sa pagsalubong ng Bagong Taon.
Anila, mas makakabuti kung iiwasan ng publiko ang paggamit ng pang-paingay na ginagamitan ng bibig dahil mas malaki ang tiyansang magbuga ito ng droplets na posibleng magdulot ng pagkalat ng COVID-19.
