LOVE IS PATIENT LOVE IS KIND| Pagsalig sa isa kag isa lyabe sa madinalag-on nga istorya sang paghigugma ni Lt. Jaywardene Hontoria kag sang iya asawa

Aminado si 2nd Lt. Jaywardene Hontoria nga mabudlay ang kabuhi sa akademya samtang yara sa sagwa ang iya nobya kag karon asawa nga si Loura Fe Dillera- Hontoria.

Apang sa pihak sini, ginpahayag ni Hontoria nga ila nasarangan ang tanan nga pagtilaw sa ila relasyon bangud sang pagsalig sa isa kag isa.

Sa interview sang RMN Sunday Special sa newlyweds, ginsaysay ni Hontoria nga nagsugod ang ila pag-abyanay ni Loura sang nag-intra sila sa isa ka pageant sa West Visayas State University .


Suno pa kay Hontoria nga halin siya sa broken relationship sadto kag iya natun-an nga indi na pag-isalig ang kalipay sa iban nga tawo apang nagapasalamat ini sa Ginuo nga nag-abot sa iya kabuhi si Loura.

Apisar may kahadlok nga masakitan liwat, ginpahayag ni Hontoria nga iya ‘ginpusta’ ang tanan sa pinaka-ulihi nga tinion kag wala naman ini napaslawan.

Suno naman sa iya misis, iya gin-antos ang kabudlay nga mahilayo sila sa isa kag isa sadtong magnobyohanay pa lang sila kag iya ginsuportahan ang handum ni Hontoria nga magsulod sa Philippine Military Academy.

” Indi ko man siya ma-stop because if i-stop ko siya pursuing his dream, indi na na siya, indi na na siya si Jayward so biskan tuod mabudlay I have to endure because hambal niya man it’s for us, it’s for our future , it’s for our family so I trust him, I really trust him and gusto ko maabot iya dreams, ” pahayag ni Loura.

Ginpahayag ni Jaywardene nga iya ginakabig nga mission ang relasyon nila ni Loura gani wala gid siya naminsar nga magbuya sa ila relasyon.

Suportado naman sila sang ila tagsa ka pamilya sang nagplano ang mga ini nga magpakasal tubtob ginhiwat ang seremonya sang ila kasal sa St. ignatius Chapel sa bagiuo City pagkatapos sang graduation ni Hontoria nga naggradwar bilang valedictorian sang PMA AlabTala Class 2018 sadtong Marso 18, 2018.

Mensahe ni 2nd Lt. Hontoria, dapat mangin positibo sa tanan nga tion.

Suno pa sa iya nga may ginapanagatubang nga problema kag pagtilaw ang tanan apang kon may positive mental attitude, masarangan ini tanan.

Dugang pa ni Hontoria nga indi dapat pagkalimtan nga yara ang Ginuo nga magagiya sa tanan kag indi gid madulaan sang pagsalig kag pagtuo sa Iya.

Facebook Comments