Lower age of liability gidebatehan

Davao City – Sa katuyoan nga mas maprotektahan pa ang katungod sa mga menor-de-edad nga masikop sa paghimo og krimen giduso ni Sen. Kiko Pangilinan ang usa ka special protection law nga mao ang Juvenile Justice Law of 2006.

Sa maong balaod, ang nag-edad og 18 anyos paubos dili na pwede presohan ni pasakaan og kaso bisan og unsa pa ka bug-at ang krimen nga nakumitar inay i-indosar sila sa Department of Social Welfare Development (DSWD).

Apan sa obserbasyon ni Barangay Lasang Kapitan Allan Simo-ag nga mas nagkadaghan pa hinoon ang mga minor nahimong kriminal sukad napanday ang Juvenile Justice Law ni Pangilinan.


Kaniadto, sa wala pa ang Republic Act 9344 kun Juvenile Justice Law minos ang mga menor-de-edad makahimo og krimen apan karon wala nay kahadlok mubuhat og krimen gumikan sa nasangpit nga balaod.

Ang mga bata nahimong bala sa mga sindikato sa droga ug mga organisadong grupo sa mga kriminal sa pagbuhat og krimen sanglit nasayod sila nga dili makasuhan ni mapreso ang mga menor tungod sa proteksyon sa balaod.

Tungod niini, pabor si Simo-ag nga paubsan ang edad sa mga bata dili maglisod ang mga otoridad sa pagpasaka og kaso ug pagpreso sa menor nga makabuhat og krimen sa katilingban.

Aminado ang kapitan nga dili sulbad ang pag-ubos sa age criminal liability sa paglobo sa mga ‘Children in Conflict with the Law’ sa nasud karon, apan wala na’y laing paagi aron salbahon ang mga kabataan gikan sa dautan nga binuhatan gawas sa pagpreso ug pagkaso kanila sa krimen nga ilang nabuhat.

RadyoMaN Joel Viray

Facebook Comments