Lungsod sa Molave nakatala og 18 ka kaso sa dengue

Molave, Zamboanga del Sur – Mitala na og 18 ka mga kaso sa dengue ang lungsod sa Molave, Zamboanga del Sur segun sa pinakaulahing report sa Municipal Health Office.
Sumala ni Leonilyn Aleman, Public Health Nurse sa Molave MHO, namatikdan ang pagsaka sa mga kaso sa dengue sugod bulan sa Abril karong tuiga nga narekord sa Barangay Makugihon, Maluluy-on, Madasigon, Dipolo ug Rizal.
Apan gipaklaro ni Aleman nga mild cases lamang ang ilang namonitor ug wala pay severe kun grabe nga mga kaso.
Gihingusgan na karon sa LGU ang paghimo og search and destroy operations pinaagi sa cleanup drive aron madistroso ang potensyal nga breeding areas sa mga lamok nga nagdala og dengue virus.
Sa tibuok Zamboanga del Sur, naobserbahan ang pagtaas sa mga kaso sa dengue hinungdan nga puno-puno na ang mga balay-tambalanan.
Sumala ni IPHO Head Dr. Anatalio Cagampang Jr., gi-consolidate na nila ang mga report sa MHO’s ug posibleng modeklara si Gov. Victor Yu og outbreak kung padayong motaas ang kaso sa dengue.
Giawhag karon sa Provincial Health Office ang kooperasyon sa katawhan aron mapakgang ang pagkuyanap sa dengue pinaagi sa pagpanglimpyo sa palibot.
Gipahimangnoan usab ang tanan nga magpakunsulta dayon sa doktor o sa health center kung makasinati og mga sintomas sa sakit sama sa taas nga hilanat ug panakit sa kalawasan.






Facebook Comments