Anaa na karon sa 100.52% ang kinatibuk-ang nabakunahan nga mga kabataan sa lungsod sa Maasim alang sa nagpadayon nga ikaduhang round sa oral polio vaccination.
Subay kana sa datus nga gipagawas sa buhatan ni Doctor Arvin Alejandro sa Sarangani Provincial Health Office kagahapong adlawa, adlaw nga Lunes, Enero 27.
Sa unang round sa pagpabakuna niaging bulan sa Nobyembre hangtud Disyembre, Maasim pud ang nag-number one sa tibuok Sarangani Province nakakuha sila og 103. 2 percent, lagpas sa target nga gihatag sa DOH Central Office.
Gikan atong Lunes, Enero 20 karong tuiga paingon kagahapon, Maasim ang nag-una sa Round 2, anaa na dayon sa 100.52 percent. Gisundan sa Maitum 96.72 percent, Kiamba ikatulo 94.57 percent, ikaupat Alabel 92.36 percent, ikalima ang Malapatan 90.75 percent, Malungon 85.47 percent, ug Glan 79.86 percent.
Sa send-off ceremony atong Enero 17, present ang halos tanang partners sa PHO Sarangani gawas sa mga community health worker and volunteers. Kanunay nakasuporta ang Philippine Red Cross, Mahintana Foundation, Save the Children, Rotary Club, DepEd Sarangani, Diagan Hospital, PAMET, PDRRMO Sarangani, ug labaw sa tanan ang mga kapulisan ang PNP Sarangani ug mga kasundaluhan ang 73rd IB ug 27th IB, nga bisan sa ilang mga checkpoint ang gapahigayon og mga pagpabakuna masiguro nga tanang bata ang mabakunahan.
Sa bahin ni Board Member Irish Arnado-BeƱola, ang SP chairperson sa Committee on Health, kung nakaya matud pa sa Sarangani nga lagpasan ang target sa DOH sa unang round sa pagpabakuna nga 95 percent apan nahimo kini sa aktwal nga 99.71 percent, walay rason matud pa nga dili usab kini mahitabo sa karon nga ikaduhang round tungod kay parehong kabataan sa gihapon ang target mabakunahan.
Hangtud pa sa Pebrero 2, sunod Dominggo, ang second round sa oral polio vaccination, sa dakong pagsuporta sa Sulong Kalusugan program ni Governor Steve Chiongbian Solon kauban sila Senador Manny ug Congressman Ruel Pacquiao, Vice Governor Elmer De Peralta, mga board member, mga mayores ug mga barangay kapitanes.
