Davao City – Patay na dihang midangat sa balay-tambalanan ang usa ka driver sa motorsiklo human mibangga sa tricycle alas-3:55 ang takna sa kadlawon kagahapong adlawa sa Purok Makugihon Brgy. Cuambog, Mabini, Compostela Valley.
Sumala sa report nga nahipos gikan sa Mabini Traffic Section, nasayran nga naglawig ang usa ka Yamaha nga gimaneho ni William Lee, 68 anyos, samtang sakay si Mryna Lee, 69 anyos, pulos residente sa Prk. Santol Brgy. Pindasan lungsod sa Mabini.
Samtang naglawig usab ang single nga motorsiklo nga Euro nga kargado ug duha ka bukag nga isda gimaneho ni Junny Baudto, hamtong ang panuigon, backride si Mario Buslangan, 41 anyos, pulos residente sa Prk. Mahigugmaon, Brgy. Kingking lungsod sa Pantukan.
Sumala sa report nga nahipos gikan sa Mabini Police Station, nasayran nga naglawig ang tricycle gikan sa Brgy. Pindasan padulong sa palengke apan atol sa pagsulod niini sa maong lugar kalit mibangga ang single nga motorsiklo gikan sa Tagum City, Davao del Norte padulong Brgy. Kingking, Pantukan hinungdan nga natumba ang duha ka mga motor.
Daling gipangdala ang mga samaran ngadto sa Davao Regional Medical Center apan gideklarang dead on arrival ang driver sa Euro nga motorsiklo nga si Junny Baudto.
Samtang ang laing tulo ka mga angol padayong gi-atiman sa mga doktor ug ang duha ka mga motor gikustodiya sa kapulisan.
RadyoMaN Jules Catisay
