Maco Road Crash: 3 patay, 18 angol

104

Davao City – Tulo ang patay samtang 18 ka mga tawo ang naangol human nagkarambola ang tulo ka mga sakyanan alas-9:00 ang takna Lunes sa buntag sa national highway Brgy. Hijo, Maco, Compostela Valley Province.

Sa report gikan sa Maco Municipal Police Station, nalambigit dinhi ang usa ka Navarra Nissan pick-up color silver gray dunay plate number nga FIP kinsa gimaneho ni Robert Paul Molina, 29 anyos, residente sa syudad sa Tagum; usa ka Toyota Innova color puti dunay plate number nga LAC 5920 kinsa gimaneho ni Paulino Camay, hamtong ang panuigon; ug Suzuki multicab dunay plate number nga LWP 759 color green kinsa usab gimaneho ni Alberto Cambal, hamtong ang paniugon, residente sa Brgy. San Roque lungsod sa Maco.


Migula sa imbestigasyon sa kapolisan nga naglawig ang Navarra Nissan pick-up ug Toyota Innova gikan syudad sa Tagum padulong sa lungsod sa mabini apan kalit nawad-an og ang control driver sa Navarra Nissan pick-up hinungdan iyang nabanggan ang wala nga bahin sa Toyota Innova diin mibangga usab ang Toyota Innova sa gikasugat nga multicab nga miresulta sa pagkamatay sa tulo ka tawo ug pagkaangol sa 18 ka mga sakay sa mga sakyanan.

Gidali pagdala ang mga samaron ngadto sa Davao Regional Medical Center nga nahimutang sa syudad sa Tagum samtang ang driver sa Navarra pick up gikustodiya na sa kapolisan.

RadyoMaN Juls Catisay

Facebook Comments

From Advertisers