Mag-ama na eowas matapos nga mag-capsize ro andang baroto

Batan, Aklan – Natigayon nga maeowas rong mag-ama matapos nga mag-capsize (naeonod) ro andang baroto kainang aga-aga sa baybayon nga sakop it Brgy. Songcolan, Batan.
Rong mag-ama nga sakay it baroto hay nakilaea kanday Domingo “Minggoy” Supreno ag Carlo Supreno, 21-anyos tanan residente man it nasambit nga lugar.
Sa pakikipag-angot it RMN Kalibo kay PSSgt. Richard Villar it Batan PNP nga nakabaton sanda it report nga may nag-capsize nga baroto ag insigida man sanda nga nag responde sa area.
Pag-abot sa lugar hay uwa man eagi sanda maka atraka bangud tuman kabaskog rong hangin ag baeod ag gin angan-angan nga makaabot sa manabaw nabaw nga porsyon rong mag-ama ag ginbuligan nga mapatakas.
Samtang sa pakikipag-angot pa gid it RMN Kalibo sa sambilog sa mga nagbulig nga mag rescue nga si Vicente Macaraig hay nasayuran nga mga ala una it aga-aga nagpanaw rong mag-ama para mag butwa it timing ag nagapauli eon kunta sa Songcolan mga alas dos halin sa ilogan it Brgy. Dumaguit tag karga eon nanda rong mga nadakpan nga kasag, alimasag ag iba pa tag mapaeong ro makina ko andang baroto.
Ginpaandar raya it uman ni Carlo ag uwa ma control, ag gindugangan pa it mabaskog nga hangin ag humbak nga gintunaan ko pagkaeonod it andang baroto.
Sa makaron hay sa mayad eon nga kahimtangan rong mag-ama matapos nga ma rescue it MDRRMO-Batan, Batan PNP ag ko pila ka mga residente.

Facebook Comments