Ibajay, Aklan — Nahaeab-an rong mag-ama matapos nga magtuhaw kabii rong sangka kumosyon sa Brgy. Bagacay, Ibajay, Aklan.
Ro mga biktima nakilaea kay Noe Solidum ro tatay, 46-anyos nga nakaangkon it tama sa waea nga abaga ag butkon ag Marwin Solidum, 20-anyos nga nakaangkon it multiple hack wounds samtang rong suspek nakilaea kay Rospecio dela Cruz, 25-anyos tanan residente it nasambit nga lugar.
Sa pakikipag-angot it RMN DYKR Kalibo kay PO1 George Regalado it Ibajay PNP nga kabii hay nakabaton sanda it tawag angot sa hacking incident ag eagi man nga nag responde.
Paga abot sa lugar hay eagi man sanda gin assist it Brgy. Kagawad ag ginturo ro nahamtangan it suspek.
Sa imbestigasyon naga guwa nga kabii rayang si Noe hay ginausoy na ro anang unga nga si Mariel it medyo pasinggit, ugaling may nagsabat sa pihak nga baeay, may diskusyon nga natabo ag nagkinagubot.
Dikara namueaw mueawan ro suspek ag sa anang pag guwa nakita na nga may kaaway ro anang igmanghod ag dikara natabo rong pagpang-eabo.
Si Marwin hay magaawat man kunta sa away ugaling pati imaw hay ginlinabo.
Eagi man nga naaresto rong suspek, gin ako ro krimen ag nakakulong eon makaron sa Ibajay PNP nga posible magapangatubang it kasong 2 counts of frustrated homicide.
