Davao City – Mukantidad sa P29,960 o 2.14 gramos nga shabu ang narekober sa kapulisan sa Toril atol sa gilusad nga buy bust operation alas-5:30 sa hapon adlaw’ng Martes sa may Purok Sto. Niño, Brgy. Agdao Proper ning syudad sa Davao.
Malampusong nadakpan sa mga awtoridad ang target sa maong operation nga si Alyas Woowie o Jomerandol Anzano, 37 anyos, ug usa ka pintor ug residente sa Purok Sto. Niño, Brgy. Agdao Proper.
Matud sa Toril PNP usa ka informant ang nisumbong sa kapulisan nga ang maong suspek aktibong gapayuhot og shabu sa area sa Toril.
Atol sa drug operation sa mga pulis nadakpan usab ang kapuyo ni Alyas Woowie nga si Michelle Leones, 36 anyos.
Gikatakdang iduso karong adlawa ang kasong paglapas sa RA 9165 kon Comprehensive Dangerous Drugs Act of 2002 batok sa mag-live-in partners.
Sukad niadtong Lunes, dul-an P200,000 na nga shabu ang nakuha sa intensified drug operations ilawon sa Toril PNP.
RadyoMaN Aimee Guinita
