SILAY CITY, NEGROS OCCIDENTAL – Isa ang patay duha ang nasamaran sa natabo nga shooting incident may mga las 11 kagab-i sa Purok Bungyod, Barangay Guimbalaon.
Nakilala ang biktima nga si Reynaldo Villaruel, 31 anyos samtang nakilala naman ang mga suspek nga mag-utod nga amo sanday Rommel Aurelio, 44 anyos kag Je-ar Aurelio, 27 anyos lunsay pumuluyo sang Brgy. Bagtik, Silay City.
Sa imbestigasyon sang Silay City Police Station ginpahayag nga una nga nagpangtaya sang armas ang biktima nga si Reynaldo sa kay Rommel gani ini sila ang nag-pukutay kag natiruhan sang biktima si Rommel.
Pila ka minutos ang nakaligad, nag-abot ang manghud ni Rommel nga si Je-ar kag iya ginbuligan ang iya utod rason nga ini ang natiruhan man sang biktima igo sa iya wala nga butkon.
Apang sang ulihi, natigayon nga maagaw ni Rommel ang armas ni Reynaldo kag iya natiruhan sa tuo nga ribs nga amo naman ang gintunaan sang kamatayon sang biktima.
Na-recover sa crime scene ang 13 ka empty shells sang calibre .45 kag isa ka deformed nga slug sang amo man nga armas.
Sa karon ang mag utod nga suspek ang padayon nga confined sa Regional Hospital halin sa Provincial Hospital sa Silay./dyHB BACOLOD
