General Santos City—gipusil sa wala pa mailhing suspetsado ang usa ka mag-uuma nga igo lang nagbaktas pauli sa ilang panimalay sa may barangay Upper Lumabat, Malungon, Sarangani Province.
Biktima giila nga si Raul Alconio, 37, mag-uuma, residenti sa samang lugar.
Ala 1:30 ang takna sa kabuntagon, nag baktas ang biktima paingon sa ilang panimalay. Pag abot duol sa Barangay Hall, usa ka lalaki ang misugat kaniya dayon siya gitiunan ug pusil.
Abtik nga giilog sa biktima ang armas diin nag inilugay pa ang mga nahisgutan, apan nakablit sa suspek ang gatilyo sa pusil nga miigo sa lawas sa biktima.
Gilayon midagan sibat ang suspek samtang ang biktima gidala sa iyang pag-umangkon nga si Joven Pagalangan sa St. Elizabeth Hospital dinhi sa dakbayan sa Gensan aron nga matambalan ang samad nga naangkon.
Ang kapulisan sa Malungon sa pagpanguna ni Police Sr. Inspector Richard Pabalinas, hepe sa Malungon PNP ang nagpahigayon nag makuting imbistigasyon kalabutan sa insidenti.
Samtang wala pa matumbok sa otoridad kung unsay motibo ug si kinsa ang suspek sa pagpamusil.
