Maga rebulto de Santo ta lagrima

31

Un grande milagro el ta sosede este tiempo na residencia del familia Santos de barrio de Cabatangan este despues el diila maga rebulto del maga Santo alegaomente ta lagrima.
Si Sandra Samson, subrina del familia Santos ya habla na RMN Zamboanga que ya descobri sila con el milagro del dia de Sabado cuando ta limpia sila con el maga rebulto del maga Santo cuando ya puede sila nota mujao el cara del diila Black Nazarene.
Porcausa deste, ya limpia sila conel Santo pero ya estraña sila cuando ya mira estos que gende man ta seca el cara del Santo.
Fuera con este, otro tambien maga rebulto del maga Santo ta inclugi el Santo Niño y hasta el maga retrato del otro maga Santo ta lagrima tambien.
Ya pone el familia Santos junto con todol diila maga Santo que todo ya tambien el ta lagrima.
Porcausa con este, ya comensa llena de maga gente el residencia del familia Santos donde ta cre sila este un milagro y tiene mensaje ta lleva el maga Santo.
Mientrastanto, si Señora Caridad Gagaracruz ta cre por el milagro que ta sosede na casa del familia Santos, ya lleva este alivio na su salud donde ya pasa lang le na su cuerpo el lagrima estaba na cara del maga Santo na su cuerpo donde ya dura ya le ta sufri maga dolencia y ya queda este aliviao.
Si Señora Maria Jessica Saracho de Guiwan ya tene tambien que apunta na casa del familia Santos para mira con el mencionao milagro donde ele mismo ya puede columbra con el maga lagrima que ta sale na maga ojos del maga Santo.

Facebook Comments