Magpamilya ginpamumusil, anak ginpugutan pa hin ulo

TACLOBAN CITY – Ginpamumusil na ngan ginpugutan pa hin ulo, sugad hini kabrutal an nahinabo ha biktima nga ginkilala nga hi Teodorico Francisco, 56 anyos, may asawa ngan usa nga parag-uma.

May nahinabo na liwat nga shooting incident ha Calbayog City, Samar kasangkulop, alas 5:45 han aga.

Ha imbistigasyon han Calbayog City PNP, nahinabo an insidente ha umahan han pamilya Francisco ha Brgy. San Jose, Lower Happy Valley ha mao nga syudad.


Ginpusil gihapon an tatay ni Teodorico nga hi Rodrigo Francisco, 75 anyos ngan usa gihapon nga parag-uma. Naangkon niya an bala hin pusil ha iya tiyan nga dapit ngan ha iya tuo nga butkon pero nakatalwas hiya ngan gindara ha Calbayog District Hospital para mabulong.

Talwas gihapon ha mao nga insidente an asawa ni Rodrigo nga hi Procisa Francisco nga nakadalagan ngan tumago ha mga puno.

Basi ha report, an ulo ni Teodorico in ginhirayo pa 100 metros tikang ha iya lawas.

Ginkikita na yana nga anggulo han mga kapulisan an politika tungod nga nakandidato an asawa ni Rodrigo nga hi Procisa pagka-Barangay Kagawad ha nasabi nga barangay.

Basi ha mga salaysay han mga nakatalwas nga biktima, may mga armado nga grupo nga may kapot nga long ngan short firearms an nagpa-uran ha ira hin bala.

Narekober ha crime scene an 15 n nga basyo han bala han Cal 5.56MM, usa nga bala han 7.62MM ngan 2 naman nga basyon hin bala han Cal .45.

Padayon an gindudumara nga imbistigasyon han mga kapulisan.
Photo by: San Juanico Balita

Facebook Comments