Magtiayong negosyante gitulis ug gipusil samaran

26

Pagadian City – Mokabat sa kapin kon kulang 30 mil pesos ang nadala sa mga tulisan sa nahitabong pagpanulis ngadto sa magtiayong negosyante alas 8:20 kagabie sa National Highway, Purok Bagong-Buhay, Balangasan, Pagadian City.
Ang magtiayong biktima nailang sila si Jovencio Espinosa Guanzon aka “Vencio”, 42 anyos ug Isabelle Espadilla Guanzon aka “Isabelle”, 38 anyos, mga negosyante ug utanon ug pulos residente Purok Bagong-Buhay, Balangasan, Pagadian City.
Duha ka wala mailhing mga lalaki nga nagsuot ug bonnet ug helmet ug armado sa Calibre .45 nga pistola ang mitulis sa magtiayon.
Sa imbestigasyon sa kapulisan, ang magtiayong biktima kauban sa 7 niini ka mga tabahante ug katabang ang sakay sa ilang Mitsubishi L300 Van apan sa pag-abot sa nasangpit nga dapit, sa kalit usa ka single motor SUZUKI Raider 150 ang miatang kanila ug gitionan sa usa sa mga suspek ang driver nga si Vencio ug mideklarang hold-up.
Gumikan sa kahadlok, napugos ang asawa sa driver sa paghatag sa gihuptang eco-bag nga adunay kapin kon kulang 30 mil pesos nga sulod.
Human makuha sa mga suspek ang bag, gipusil pa niini ang mga biktima sa makaduhang higayon ayha misibat paingon sa wala masayring direksyon.
Nakaangkon si Jovencio ug samad pinusilan sa walang bahin sa iyang liog samtang sa dughan usab ang igo sa iyang asawa nga si Isabelle.
Daling gidala ang mga biktima sa Aisah Medical Hospital arun katambalan.
Narekober sa Mitsubishi L300 Van, ang usa ka basiyo sa bala sa Cal .45 pistol, ug gidala na sa PNP Provincial Crime Laboratory.
Kasamtangang anaa na sa luwas nga kahimtang ang magtiayong negosyante.

Facebook Comments