Magulang ginhatok-hatok labo sang iya manghod, patay; "may nagahutik sa akon!" – suspek

Mambusao, Capiz – Patay ang 47 anyos nga magulang matapos ginhatok-hatok labo sang 41 anyos nga manghod sa sulod sang ila puluy-an sa Sitio Malogo, Barangay Batiano, Mambusao, Capiz mga alas 8:00 ang takna sang nagligad nga gab-i, Setyembre 2, 2017.

Ginkilala ang biktima nga si Marianita Laguda Lapso samtang ang suspek amo si Rodelio Laguda Lapso, lunsay residente sang nasambit nga lugar. Base sa imbestigasyon sang Mambusao PNP, nag-abot sa ila nga puluy-an ang biktima nga si Marianita nagikan sa ulumhan kag hinali nga ginlabo sang makapila ka beses sang iya manghod gamit ang 27 pulgadas nga binangon.
Nag-angkon sang madamo nga pilas sa nawala nga guya kag iban pa nga bahin sang lawas ang biktima, nga amo ang gintunaan sang iya kamatayon. Gilayon nga nagresponde ang mga Barangay officials kag natigayon nga nadakpan ang suspek pinaagi kay Kagawad Abel Villareal kag gintugyan ini sa mga kapulisan. Nakuha sang mga kapulisan sa ginluntaran sang krimen ang binagon nga gingamit sang suspek sa paglabo sa iya kaugalingon nga magulang.

Nahibaluan nga si Rodelio Laguda Lapso amo man ang ginatudlo nga nagpatay sa iya asawa kag anak sang tuig 2009 apang nakagwa sa prisohan matapos ginpaidalom sa rehabilitation sa Mandaluyong City, Metro Manila. Ginbalik ini sa Capiz Rehabilitation Center sang nagligad nga bulan sang Pebrero sa sini nga tuig kag dalayon nga ginpagwa sa mando sang korte matapos nga magbalik sa normal ang iya paminsaron.
Sa exclusive interview sang DYVR RMN Roxas sa suspek, ginpahayag sini nga may naghutik kag may nabatian ini nga tingog nga nagasugo sa iya. Suno pa sa iya nga ginpati sini ang amo nga tingog nga utason sini ang kabuhi sang iya magulang.


Facebook Comments