Roxas City, Capiz – Ginkumpirmar ni Mambusao Mayor Leodegario ‘Jun’ Labao Jr. ang desisyon sini nga magapapili sa pagka-congressman sang segundo distrito sang Capiz sa maabot nga eleksyon sa tuig 2022.
Iya man nga ginpat-od nga indi na mabugras ang sa subong mabakod nga alyansa nila ni Capiz Governor Esteban Evan Contreras.
Kadungan sini, matigdas man nga ginsiling sang alkalde nga wala na sang tsansa nga sila ang maga-updanay pa 2nd district Congressman Fredenil ‘Oto’ Castro sa isa ka partido.
Ginpunto ni Labao nga manugtapos na ang termino ni 2nd district Congressman Fredenil ‘Oto’ Castro gani nga kadungan sini magatapos naman ang iya nga pagsuporta para diri.
Mahibaluan nga una na nga ginkumpirmar ni Castro nga pagasuportahan sini ang pagduso sang kandidatura sang iya asawa nga si former 2nd district Congresswoman Jane Castro tal-os sa iya sa pagka-congresswoman sang second district.
Samtang sa pihak nga bahin, ginkumpirmar ni Labao nga halos plastado na ang iya nga mga posible mangin kandidato sa pagka-alkalde sa mga kabanwahanan sa second district.
Suno pa kay Labao nga amu ang presidente sang Mayors League of the Philippines- Capiz Chapter, kalakip sa mga ginatib-ong sini nga mangin kandidato sa pagka- alkalde amo sanday Vice Mayor Stephen Alayon sang Sigma, incumbent Vice Mayor Roger Flores sang banwa sang Cuartero, incumbent Mayor Roberto ‘Nonong’ Palomar sang Tapaz, incumbent Vice Mayor Clemente ‘Budong’ Firmalino sa Dumalag, Vice Mayor Leslie Warren ‘Biboy’ Benjamin sa Dumarao, SB Zenny Chapman sa banwa sang Ivisan, SB Julius Orillos sang banwa sang Sapian, incumbent Vice Mayor Ildefonso Cusay sa Jamindan kag Engr Boy Baruela naman sa banwa sang Dao.
Samtang, nagapabilin pa nga blangko ang sa bahin sang banwa sang Mambusao kun sin-o ang igatib-ong sini nga mangin kandidato sa pagka-alkalde. Apang matunog diri ang ngalan ni former Board Member kag subong municipal administrator Jeffry Layo samtang isa man sa ginakonsiderar amu si VM Fred Leal.
