Mandatory ROTC suportado sa AFP

18

Davao City – Suportado karon sa 10th Infantry Division Philippine Army ang lakang sa administrasyong Duterte nga buhion ug himoong mandatory ang ROTC sa tanang estudyante sa senior high.

Matud ni 10th ID spokesperson Capt. Jerry Lamosao nga gikinahanglan kaayo mabansay daan ang mga estudyante kay mao kini ang bunluton sa AFP kung girahon sa ubang nasud ang Pilipinas.

Dinhi sa Pilipinas, ang armadong kusog gilangkuban sa Philippine Army, Philippine Air Force, Philippine Navy ug Philippine Marines.

Ang gidak-on sa atong pwersa-militar wala ray katunga sa kusog sa China nga adunay kapin 1M ka aktibong sundalo kun ‘standing army’ ug 500,000 reservists.

Ugaling musangko sa giyera ang bangi sa West Philippine Sea, sigurado gayud nga mapukan ang Pilipinas gumikan sa kadaku sa puwersa ug modernong kahimanang pang-gyera sa Asian superpower.

Busa opinyon karon sa ubang pabor sa panawagan nga buhion pag-usab ang Reserved Officers Training Corps nga niining panahona, angayan na nga himoon kini nga mandatory sa tanang estudyante.

Si Pres.Rodrigo Duterte nisugyot karon sa Kongreso nga ipasa ang Mandatory ROTC apan i-aplikar sa Grades 11 ug 12 ug dili sa kolehiyo sama sa naandan sa nanglabay nga katuigan.

Gawas sab niini, ang disiplina ug ang nasyonalismo sa kabataan mahulma pag-usab nga napapas sukad giwagtang ang ROTC ug gihimo kining optional ubos sa National Service Training Program (NSTP).

Namatikdan nga sukad giwala ang ROTC, daghan sa mga batan-on karon nahiloan sa mga militante mao nang dili lang kay wa na’y batasan sa mga ginikanan apan nahimo pa gyod nga rebelde ug nakigbatok sa kagamhanan.

Gisaway ug gibatikos usab ni Lamosao ang LFS, Anakbayan ug Kabataan Partylist gumikan sa ilang pagsupak sa mandatory ROTC nga unta alang man kini sa kaayuhan sa tibuok nasud.

RadyoMaN Joel Viray

Facebook Comments