Roxas City, Capiz- Kahadlok ang nabatyagan kag nagahilibion nga nagparekord sa Roxas City PNP ang isa ka 23-anyos nga dalaga nga biktima sang sexual harassment nga kahimuan sang isa ka manyakis nga driver sang colorum nga traysikol.
Ginsaysay sang biktima sa mga kapulisan nga nagsakay ini kaupod ang isa pa ka pasahero nga abyan man niya mga alas 9:52 ang takna sa gab-e.
Una nga nagpanaog ang upod sini sa area sang Lawaan Roxas City.
Suno sa biktima, samtang yara sa madulom nga porsyon sa Pangpang, Bolo hinali siya nga gin-uyatan sa kamot sang suspek.
Wala pa ini makontento, ginpapondo sang suspek ang traysikol kag siya ang gintuyo nga halokan. Diri nakatiyempo ang biktima paagi sa pagtampa kag pagsipa antes nga nagpalagyo kag nagpangayo sang bulig sa mga residente sa palibot.
Naalarma ang suspek kabangdanan ini ang dali-dali nga nagsakay sa traysikol kag nagpalagyo palayo sa lugar.
Nahibaloan nga nagatrabaho sa isa ka talatapan sa city government ang 23-anyos nga biktima nga taga-Barangay Bago.
