MAR ROXAS | Anay tiglikom sang DILG, bukas sa pagpapili sa 2019 elections; lokal nga posisyon sa Capiz, isa sa mga ginakonsidera

CAPIZ – Bukas sa gihapon ang anay tiglikom sang Department of Interior and Local Government (DILG) nga si Mar Roxas sa pagpapili sa masunod nga eleksyon sa 2019.
Sa isa ka press conference, ginpahayag ni Roxas nga ginakonsidera man sini nga magpanaug sa lokal nga lebel bangud may mga grupo nga nagaduso sa iya nga magpapili sa lokal nga posisyon sa probinsya sang Capiz, apang ginapanumdum kag ginatun-an pa sini kon batunon ang amo nga proposal.
Emosyonal nga ginpasalamatan sang anay tiglikom ang padayon nga suporta kag pagpalangga sang mga Capizeño sa iya pamilya humalin pa sa iya nga lolo nga nangin presidente sang Pilipinas, amay nga nangin senador tubtub sa iya nga nagserbi man bilang congresman kag senador.
Ginpahayag dugang ni Roxas nga tuman ka dako ang utang nga buot sang iya pamilya sa mga taga-Capiz. Isa man si Roxas sa mga ginakonsidera sang Liberal Party nga magpapili sa pagkasenador sa 2019 elections.
Suno pa sa tiglikom, nga naga-enjoy anay ini bilang isa ka pribado nga indibidwal kag nagabawi ini sa iya pamilya bangud sang malawig nga tinuig nga yara ini sa public service.
Apisar nga isa ka pribado nga indibidwal si Roxas, prayoridad gihapon sini ang mga taga-Capiz.
Isa sa mga ginaduso sini nga proyekto sa Capiz ang deworming agud mabuligan ang mga kabataan nga mangin healthy kag makalikaw sa bulate. (web photo)

Facebook Comments