March: Fire Prevention Month

Davao City – Ginakonsidera ang bulan sa Marso isip Fire Prevention Month tungod kay sagad sumala pa mahitabo ang insidente sa sunog sa maong bulan.

Apan bisan pa man sa ubang bulan, dagha’g gihapon og mga panghitabong sunog diin mas dagkong damyos pa gani ang matala. Kini ang rason nganong padayon ang kampanya sa Bureau of Fire Protection (BFP) aron kalikayan lamang ang sunog bisan sa unsang panahon.

Nasayran nga sagad hinungdan sa sunog mao ang problema sa elektrisidad rason nga kanunay nga nagpahimangno sa kabomberohan nga mag-amping kanunay sa paggamit sa appliances sulod sa panimalay.


Angay i-check kanunay ang mga wirings sulod sa balay.

Angay nga dili pasagdan ang nakasaksak nga mga gamit.

Dili biyaan ang ginaluto.

Ayaw gamit og tubig sa pagpalong sa mga electrical-related fire. Inay, palunga ang circuit breaker ug tanggala sa outlet ang gamit.

Kung sa kusina nahitabo ang sunog samtang nagluto, ayaw bubo-i og tubig ang nagkalayo nga mantika, inay gamit og trapo nga walay buslot, tabuni ang karahay ug palunga ang source sa gas.

Kung muabot sa punto nga nasunog ang parte sa tao, hapa sa salog, tabuni ang nawong, ug ligid aron mawala ang kalayo.

Pipila lamang kadto nga mga tips nga angay himuon panahon sa insidente sa sunog.

Apan ayha pa man mahitabo ang maong delikado nga sitwasyon, mas maayong likayan na lamang kini.

Partisipar sa ginahimong kampanya, orientation ingon man drills sa BFP sa inyong kabarangayan, aron madugangan ang imong kahibalo ug imo usab kining mapaambit ngadto sa uban. Kasama, amping kanunay!

RadyoMaN Kirby Manzon

Facebook Comments