Gi-presenta kagahapon sa kapulisan ang 180 ka mga tanom nga marijuana nga ilang nakumpiska gikan sa rooftop sa usa ka balay sa Barangay Cadayonan sa lungsod sa Balindong, Lanao del Sur, niadtong nakalabay’ng adlaw.
Matud pa ni Police Chief Inspector Alvison Mustapha, hepe saBalindong Municipal Police Station, ang nasangpit nga balay gipanag-iyahan sa usa ka Ali Langco.
Pipila lamang ka kilometro ang gilay-on niini gikan sa munisipyo sa nasangpit nga lungsod.
Miingon si Mustapha nga wala na sa maong balay si Langco ug ang iyahang ang umagad nga si Moner Sangcopan sa ilang pag-abot niadtong Martes.
Si Sangcopan ang gitudlo’ng tag-iya sa maong mga marijuana nga usa-usa’ng gitanom sa plastic cellophane.
Nadawat matud pa, sa mga utoridad, ang maong impormasyon gikan sa nagpakabanang lumulupyo sa barangay.
Gawas sa maong mga tanom, nakumpiska usab sa mga pulis ang gipa-uga nga mga dahon niini, indikasyon nga dugay na kining gihimo sa suspek, matud pa ni Mustapha.
Dugay, matud pa, nilang nadiskubrehan ang maong mga tanom tungod kay naa kini nahimutang sa rooftop sa duha ka andana nga balay.
Gipangitan na ang mga suspek samtang naka-file na kagahapon ang kaso batok ngadto kanila.
