Nagalab-ot na sa masobra 4,043 ka bags ukon 240, 243.19 kilograms nga produkto nga palay sang mga mangunguma sa South Cotabato ang nabakal sang provincial government paagi sa BINTIKU Agricultural Multi-Purpose Cooperative sa idalom sang palay support fund halin Oktubre 25 tubtob Nobyembre 8 subong nga tuig.
May-angot sini, suno kay Provincial Agriculturist Justina Navarete nagalab-ot na sa masobra P4.6 million ang nagamit halin sa P10 million nga ginpain nga pondo para sa palay support fund sang provincial government.
Ginkumpirmar man ni Maam Navarete nga may nabaton sila nga reklamo angot sa implementasyon sang palay support fund matapos nga indi tanan maakumudar tungod sa limitado nga pondo.
Apang ginapaklaro niya nga wala sang palakasay nga nagakatabo sa nasambit nga programa tungod ginabasehan man nila ang masterlist kag guidelines.
Dugang pa ni Navarete nga ang mga wala nakaavail subong nga tuig nga implementasyon sang palay support fund ang mangin prayoridad naman sa masunod nga tuig kag mas daku ang pondo nga nagalab-ot sa P20 million ang ginapropose nila nga budget.
Nahibaluan nga P19.00 kada kilo ang panguha sang BINTIKU sa produkto nga palay sang mga mangunguma sa probinsya.
