Masobra P1.89 million nga kantidad sang illegal drugs ginguba sang PDEA 12.

9

Tigayon nga ginguba sang Philippine Drug Enforcement Agency ukon PDEA 12 ang P1, 886,277.00 nga kantidad sang iligal nga droga paagi sa thermal decomposition sa Monte Cielo Eternal Gardens, Brgy. Mabuhay, General Santos City, alas 2:00 kahapon nga adlaw, Mayo 6, 2021.
Suno kay PDEA 12 Regional Director Naravy Duquiatan katuyuan sang nasambit nila nga tikang ang agud nga madula ang duda sang publiko nga ginarecycle ang mga nakumpiskar nga illegal drugs.
Ginabug-usan sang 269.0912 grams sang Methamphetamine hydrochloride ukon shabu kag 109.5393 grams sang dried marijuana leaves nga ginturned -over sang 20 ka mga Regional Trial Courts sa rehiyon sa kabug-usan nga 400 ka kaso nga may Court Order para sa destruction halin Oktubre 16 tubtob Mayo 4 subong nga tuig.
Lakip man sa gingbua ang expired regulated drugs sang 23 ampules sang Morphine sulfate kag 206 ampules sang Nalbuphine hydrochloride nga halin sa mga nagkalain-lain nga botika sa rehiyon.
Ang pagguba sang illegal drugs ang base sa Section 21, Article II sang Republic Act 9165 and Dangerous Drugs Board (DDB) Regulation No. 1 series of 2002.
Ginpangunahan naman sang PDEA 12 ang pagguba sang illegal drugs kag ginsaksikahan sang mga lokal opsiayal kag representante sang mga nagkalain-lain nga ahensya sang gobyerno sa rehiyon.

Facebook Comments