Mati road crash: Usa patay, usa samdan

Davao City – Patay ang usa ka driver sa motor samtang samaran ang angkas niini human mibangga sa kasugat niining pampasaheroang van nahitabo sa Bigue, Barangay Dawan, Mati City, alas 4 sa hapon kagahapong adlawa, June 23, 2019.

Sa interview sa DXDC RMN Davao kang Police Staff Sergeant Christopher John Doylado, giila ang namatay nga si Mr. Serapio, 30 anyos samtang anaa karon sa SPMC ang samarang angkas sa motor nga si Mr. Manuel diin ang duha pulos taga Mati City.

Sa imbestigasyon sa kapulisan, gikan sa managlahing direksyon ang van ug motor gani duha ang ginalantaw nila karon nga anggulo nga mao ang pag overtake sa driver sa motor sa usa ka sakyanan hinungdan nga mibangga ug ang pagkawat og linya sa driver sa van hinungdan nga nakasugat niini ang motor ug na head on kini apan padayon pa usab nila kining ginaimbestigahan.


Hinuon walay samdan nga mga pasahero sa van nga padung unta sa Davao City gikan Bagangga diin ang driver niini nga si Wilbert Duran, 40 anyos, taga Bunawan ning dakbayan anaa na sa kustodiya sa kapulisan ug gikatakdang pasakahan og kaso.

Pahinumdom ni Doylado ngadto sa mga motorista nga mag amping sa pagmaneho sa kadalanan aron usab makalikay sa aksidente.

RadyoMaN Renz Barbarona

Facebook Comments