RMN Laoag – Saanen nga agparparangen ni Pasuquin Mayor Ferdinand Aguinaldo kalpasan a rimuar ti NARCOLIST ni Presidente Rodrigo Duterte itay kallabes. Umun-una iti listaan ni Aguinaldo a nakasurat iti rehiyon uno.
Segun ti report, naudi a nagparang ni Aguinaldo idi Myerkules, Marso 20 iti uneg ti Munisipyo ken maipagarup nga adda ti innalana a ramramit ken agdardaras daytoy a timmalaw. Saan met ammo dagiti empleyado no sadino ti napanan ti nadakamat a Mayor.
Malagip a maipagarup a natiliw ni Aguinaldo idi Hulyo 8, tawen 2016 iti drug-bust operation ti Philippine National Police sadiay Metro Manila.
Iti rimuar a NARCOLIST ni Presidente Duterte, kaaduan kadagitoy ket opisyal ti gobierno ken huwes. Agtultuloy met ti panagsukisok ti Presidente ken kalikagomna nga ibulgarna a dagus dagitoy nabatbati a karaman ti transakyon ti illegal a droga.
Bernard Ver, RMN News
