Mayor han Sta. Fe Leyte, nakabunggo ha reporter han Rappler ngan member han Kadamay

3864

TACLOBAN CITY – Nabundol han White Isuzu SUV an myembro han KADAMAY Eastern Visayas ngan an reporter han Rappler nga nagcocover han gios-protesta o kun rally kakulop ha Rizal Avenue Tacloban City.

Ginkilala an mga biktima nga hira Conciso Labagala Ocasla, 42 anyos, waray asawa, usa nga parag-uma, myembro han KADAMAY ngan residente ha Brgy. 37 Reclamation Area ha Tacloban ngan hi Jasmine Radomes Bonifacio, 48 anyos, reporter han Rappler ngan residente ha Brgy. 83 Cogon, San Jose ha Tacloban.

Ginkilala naman an nakabunggo nga hi Oscar Josico Monteza, may asawa, ngan Mayor han Sta. Fe Leyte.

Ha nagawas nga inisyal nga imbistigasyon han mga otoridad, ginbabaybay han sarakyan an kakalsadahan han J. Romualdez St. ngan pag-abot niya ha Rizal Avenue in aksidente daw nga nabundol an mga nasabi nga biktima.

Samaran an mga biktima ngan igindara dayon ha hospital.

Ha exclusive interview han RMN kan Rappler reporter Jasmine Bonifacio, nagtugot hiya han hangyo han anak han alkalde nga pagawson ha detention an Mayor tungod nga lagas na pero may ginpapapirmahan ha iya an abugado han alkalde nga papel nga may nakasurat nga diri niya kakasuhan an Mayor ngan an pamilya na han alkade an magbabaton han medical expenses han reporter han Rappler.

“For humanitarian consideration, tumugot ako nga pagawson ha detention an iya tatay pero bumalik an ira lawyer ha ak ngan may ginpapapirmahan nga papel nga may nakabutang didto nga free an [mayor] from criminal ngan civil liability.”

“Ginkukuha gihapon nira an sarakyan, dadad-on daw nira. Although, may nakabutang liwat didto nga mashoulder hira han mga expenses ha hospital.”

Pero waray pumirma an reporter han Rappler hini nga iginpapapirma ha iya.

Nakagawas na liwat an alkalde ha detention cell han Tacloban PNP.

Sumala naman kan PCInsp. Rex Cantillep, deputy City Director han Tacloban PNP, naospital hi Mayor Monteza.

“Naconfine kuno ini hadi nga suspek tapos yana in diri maupay an iya kondisyon amu nga nahospital. Medyo waray ada hiya makakuan [makailob] han iya sitwasyon kagab-i, ginkikita man gihap naton an safety han aton suspek.”

Dugang han opsiyal, waray nira ipailarom ha alcohol test an Mayor pero makikit-an daw ini ha medical result han kaospital hini.

Siring naman ni Rappler reporter Bonifacio, diri na nira nakokontak an ginhatag nga numero han pamilya Monteza nga ansya unta iton mabaton han garastuson medikal.

Diri na ngani magpa-abat ha ira hi Mayor Monteza in desidido hiya nga pasakahan ini hin kaso.

Facebook Comments