Davao City – Hapit ma-ugdaw ang buhatan sa usa ka iladong mantalaan nga nakabase sa siyudad sa Dabaw human miulbo ang sunog sa mao nga gambalay alas-4:30 ganinang kadlawon.
Apan maayo na lang kay paspas nakaresponde ang Bureau Fire Protection Bangoy Station ug gilayon gipasiritan og tubig ang nasunog nga portion sa buhatan sa Sunstar Davao nga nahimutang sa dalang Jacinto ning dakbayan mao nga wala ra makakuyanap ang kalayo sa building.
Sa gihimo nga imbistigasyon ni Fire Officer 3 Oyzon, nagsugod ang kalayo sa ikaduhang andana kung asa nahimutang ang paghimo og mga balita ug uban pang mga buhatan sa Sunstar Davao apan maayo na lang kay dali nabantayan sa sekyu.
Giingon ni Oyzon nga electrical short circuit ang rason sa sunog nga dali ra usab napalong sa mga kamboberohan human sa pila ka minuto nga pagresponde diin mukabat sa 30 mil ka pesos ang damyos sa insidente.
Walay natala nga dunay angol o namatay sa naasoy nga panghitabo.
RadyoMaN Joel Viray
