Menor de edad napalgang patay

Sakit alang sa mga ginikanang mahibal-an nga ang na-missing nila nga anak, nakaplagang wala nay kinabuhi.

Human sa pila ka adlaw nga na-missing, gituuhang gilugos sumala pa ang usa ka menor de edad nga nakaplagang wala nay kinabuhi sa kasagbutan kaganinang buntag sa Barangay Tiguman, Digos City.

Nasayran nga nawala ang maong dalagita sukad kaniadtong adlawng Huwebes diin grabe na ang pagpangita ug kabalaka sa ginikanan niini gani ila na usab gipanawagan ang maong pagkawala.


Sumala sa report sa Digos PNP, ang uyuan mismo sa bata ang nakakita sa dihang iyang gisubay ang dalan padulong sa skwelahan sa bata, nakit-an niya iyang pag umangkon nga si Alyas Ana, 14 anyos, estudyante ug residente sa nasangpit nga lugar diin ang maong bata wala nay kinabuhi.

Daling nangayo og tabang ang uyuan niini nga si Alyas Roy ngadto sa mga silingan ug kapulisan gani daling miresponde ang kapulisan sa Digos City Police Office ug gilayong mihimo og imbestigasyon kauban ang Scene of the Crimes Operatives kun SOCO.

Sa maong imbestigasyon, nakita sa kapulisan ang mga gamit sa bata gani ang suot usab niini nga underwear nakit-ang gisangit.

Lakip nakita ang usa ka color green nga stripe T-shirt ug giila sa mga residente ang tag-iya sa maaong t-shirt nga si Victor Maglahus, 32 anyos, ulitawo ug residente sab sa lugar diin iyang giangkon nga iyaha ang t-shirt apan gilimod ang nahitabo sa dalagita.

Daling gipusasan ang maong lalaki lakip na usa ang usa pa ka lalaki ug gidala sa Digos PNP alang sa dugang imbestigasyon.

Samtang ang patayng lawas sa bata, gidala na sa punerarya.

RadyoMaN Renz Barbarona

Facebook Comments