Un pulis ya accidentalmente ya puede sopla de tiro con un alegao menos pensante despues este ataca conele na Zone 6, Mendoza Drive, Culianan aye raga.
Si SPO3 Raul Galvez, designao na Culianan Police Station aboard na su motorsiclo encamino para na mencionao lugar para chequia consu cargo truck cuando ya llega le Mendoza Drive, ya columbra le con un tal Norman Comedoy y Book, 29, soltero quien aquel tiempo ta hace nas-nas con Rey Patrick Lacno y Guevara, 19, del mencionao lugar.
Mirando con el incidente, si Galvez ya parra na su motorsiclo y ya precura afasigua hablando que un pulis le.
Pero si Comedoy ya bira el rabia conele y aqui ya comensa este ataca conele pormedio de sopla de puñetaso hasta ya tumba si Galvez.
Ya precura si Galvez arangca su pistol para hace miedo con COmedoy pero asegun ya precura este rebata con el pusil hasta ya rebenta este ya tupa conele na esquierda braso y yan lampas na su detras.
Con Comedoy ya lleva na hospital mientras si Galvez ya sostene tambien irida na su cuerpo. Si Comedoy ay enfrenta caso de direct assault na corte
