Roxas City, Capiz- Nakatuon na sang leksyon ang mga border patrollers sa Capiz.
Ini matapos ang insidente sang pagkalusot sa border checkpoint sa banwa sang Dumarao ang armored van nga may karga nga pasahero halin sa syudad sang Iloilo.
Ini ang natabu sa pihak sang pagpaidalom sa probinsiya sang Capiz sa enhanced community lockdown kag mas strikto nga border restriction.
Ginpahayag ni Police Captain Leomindo Tayopon sang Ivisan MPS nga natukiban nila sa ila checkpoint nga sakay sang amo nga armored van ang mga persona nga taga banwa sang Ivisan nga naghalin sa Iloilo.
Gilayon ini nga nagtawag sang Barangay Health Emergency Response Teams kag katapo sang Municipal Health Office agud mapasiguro nga naka-home quarantine ang amo nga mga persona.
Nahibaluan nga wala na natigayon nga mainspeksyon ang amo nga armored van sa pagdumdom nga kwarta ang unod sini kag indi tawo.
Bangud sini suno kay Tayopon gina-inspeksyon na nila sa subong ang sulod sang mga armored van.
