Kapin kon kulang P500,000 ang kinatibuk-ang danyos sa dakung sunog nga miulbo kagahapon sa buntag diha sa Purok 2, Brgy. Mahogany ning syudad sa Butuan.
Dul-an sa 40 ka panimalay nga pulos gama sa ‘light materials’ ang gilamoy sa kalayo ug natala ang duha ka mga senior cirtizens nga na-injured usab sa maong insidenti.
Nasayran nga natunok ug lansang ang biktima nga si Josefa Maamo, 60 anyos gumikan sa pagdali-dali nga makalikay sa sunog samtang nakaangkon usab ug 1st degree burn sa iyang kamot ang biktima nga si Lolita Lanchinibre, 66 anyos parehung residenti sa maong barangay.
Ang duha ka angol parehung gidala sa Butuan Medical Center (BMC) aron patambalan. Nagsugod ang kalayo sa panimalay ni Daday Beto kinsa kasamtangang gipuy-an sa pamilyang Mendoza pinaagi ni Nelson Mendoza ug sanglit gama lamang sa light materials ug nagdug-ol pa ang mga balay hinungdan nga daling mikuyanap ang kalayo.
Daling nakarespondi ang taga Bureau of Fire Protection (BFP) kauban ang pipila ka mga Fire Volunteer Brigade sa lugar apan naugdaw gihapon ang daghang mga panimalay.
Padayon pa’ng giimbistigahan sa BFP ang hinungdan sa sunog ilabina adunay migawas nga impormasyon nga adunay duha ka mga bata ang nagdula ug posporo ug papel sa panimalay kung asa nagsugod ang kalayo (with report archer capadeso/ivy falcone).
