Mga empleyado sang LTO Bacolod magapaidalom sa swab test matapos gin lockdown ang ila opisina

Magapaidalom sa swab test ang tanan nga empleyado sang Land Transportation Office (LTO) Bacolod matapos nakapalapit sa ila opisina ang isa ka locally stranded individual (LSI) nga nagpositibo sa COVID-19.Nahibaluan nga naka-lockdown sumugod subong nga adlaw ang LTO Bacolod para sa disinfection.

Sa interview sang DYHB kay LTO Bacolod head Reuben Tampos, ginpahayag sini nga nagsulat na ang ila regional director kay Bacolod Vice Mayor El Cid Familiaran nga naga-request agud ipaidalom sila sa swab test nga mga empleyado. Kapin sa 46 ka empleyado sang LTO Bacolod ang iga-swab test lakip na ang mga security guards kag utility workers.

Hulyo 16 kag 17 nagkadto sa LTO Bacolod ang LSI gikan sa Cebu nga residente sang Victorias para mag-renew sang iya nga drivers license kag sang Hulyo 26 naguwa nga positibo ini sa coronavirus.


Samtang ang mga taga-LTO ang nagpaidalom sa rapid test sang Hulyo 20 kag sang Hulyo 23 nahibaluan nila nga negatibo sila tanan. Sa karun indi pa mahambal ni Tampos kun maga-bukas na ang opisina sa Lunes bangud hulaton nila ang advice kun sila ang maga home quarantine.

[image: image.png]

Facebook Comments