Mga fire victims sa Culasi Roxas City, nagakinahanglan sang bulig!

Roxas City, Capiz – Nagakinahanglan subong sang bulig ang indi magnubo sa 30 ka mga households nga nabiktima sang sunog sa Brgy Culasi Roxas City kaina sang hapon.
Ini matapos ginlamon sang kalayo ang ila mga panimalay kag propidad.
Base sa inisyal nga impormasyon, naghalin ang kalayo sa poluy-an nga ginapanag-iyahan sang pamilya ni Teresa Panaguiton sa diin ang naglupok nga electric fan ang ginapatihan rason sang amo nga sunog.
Nahibaloan nga madasig nga naglapta ang kalayo bangud dikit-dikit ang mga panimalay samtang nabudlayan naman nga makasulod sa lugar ang mga katapo sang Bureau of Fire Protection bangod sa makitid nga alagyan.
Nagdugang pa diri ang mainit nga panahon kag mabaskog nga hangin gani nga wala gid matabangan ang nasambitan nga panimalay.
Sa interview sang news team sa City Fire Marshall sang BFP-Roxas nga si Fire Senior Inspector Stephen Jardeleza, alas 2:15 na sang hapon sang ila gindeklarar nga under-control ang sunog.
Padayon pa nga gina-establisar sang arson investigator sang Roxas City Bureau of Fire Protection ang kabangdanan sang sunog kag kun pila ang kabug-osan nga kahalitanan sini.

photo © Burj Al/Ferocity

Facebook Comments