BACOLOD CITY – Nakilala na ang duha ka mga suspek nga nagkalamatay sa natabo nga shootout matapos nga nagpanghold-up may mga las 4:30 kahapon sang hapon sa Abuanan Road, Purok Nami-nami Uno, Brgy. Sum-ag, ciudad sang Bacolod.
Ini sila amo ang magpaka-isa nga sanday Arnel Espadon, Alias Enoy, 29 anyos ang edad, may asawa kag isa ka bata subong man si Ryan Alib alyas Tiboy, 24 anyos, soltero kag lunsay pumuluyo sang Sitio Antawan, Brgy. Canlandog, banwa sang Murcia. Si Ryan ang kinaagot sa syam ka mag-utod kag panguma ang trabaho sa ila duta.
Sanday Espadon kag Alib ang nagkalamatay bangud ginaalegar nga ini sila ang nagbato sa mga katapo sang SWAT team nga naglagas sa ila matapos nga ini sila ang nagpanghold-up sang isa ka delivery truck may mga las 4 kahapon sang hapon sa area sang Purok Maghili-ugyon, Brgy. Taloc, Bago City.
Sa amo nga insidente, wala labot sa napatay nga duha ka suspek, may isa pa ka nasalabat nga sibilyan nga napatay man kag ginkilala nga si Delfin Ortiz, 69 anyos ang edad nga una gindala sa South Bacolod General Hospital, apang gindeklarar dead on arrival.
Wala labot sa nagkalamatay, may 3 ka iban pa nga nasalabat sa shoot out kag nakilala nga sanday Estrella Claridad, 72 anyos, Mikaela Malabor, Grade 9 student, anak ni Isabela Mayor Joselito Malabor kag Walter Dojena.
Sa pihak nga bahin, nag-ako naman ang driver sang delivery van nga nakilala kay Ruben Cuelo, 38 anyos ang edad nga ka-konsabo siya sang mga suspek nga naghold-up man mismo sa iya.
Nabuko ang partisipasyon sang driver bangud man sa cellphone nga narecover sa crime scene kon diin nakita ang pagbayluhanay nila sang message sang mga suspek.
Sa interview sa ginikanan sang isa sa napatay nga suspek nga si Tatay Allan Espadon, nga iya nahibaluan nga ginpatawag sang tiyo sang iya asawa sang ila anak nga si Arnel nga ulihi sa ila duda, amu ang driver sang panel van nga si Ruben.
Suno naman kay Reyna, panglima sa siyam ka mag-utod nga Alib, nga nagkadto sa ila balay sa banwa sang Murcia si Arnel kag nagsiling nga ginpatawag siya sang tiyo sang iya bana.
Siling ni Arnel nga ini siya ang mapa-service sa motor nga iya naman sang isa pa sa napatay nga si Ryan Alib.
Pahayag sang himata sang mga biktima nga nakibot na lamang sila sang nabatian sa DYHB ang natabo sa 2 ka mga suspek bangud indi sila magpati nga mahimo ini nanday Arnel kag Ryan./Photo: Kuha ni Albert Giner sa utod ni Ryan nga si Reyna.
