Mga inmates sang Capiz Rehabilitation Center, ginareklamo ang administration officer sang CRC nga matinik’ sa diskarte sa mga nagabisita nga asawa sang inmates!

15

Roxas City, Capiz- Ginareklamo subong sang mga inmates sa Capiz Rehabilitation Center ang ginahimo nga pagdiskarte sang empleyado nga si Andreo Llaver sa ila mga asawa nga nagabisita sa amo nga pasilidad.
Sa interview sa tagreklamo nga inmate, ginpahayag sini nga nagbisita sa CRC ang iya asawa sang nakaligad nga bulan sang Mayo 2020. Nahibaluan niya nga gintanyagan ni Llaver ang iya asawa nga sugaton kag idul-ong ini halin sa ila poluy-an pakadto sa CRC. Ginpangayuan pa niya ini sang contact number. Suno pa sa asawa sang inmate, kun indi ini magpasugot gipiton ang iya bana nga yara sa sulod sang Capiz Rehabilitation Center.
Nagakabalaka ang nasambitan nga mga tagreklamo bangud sa posibilidad nga mabutang sa delikado nga sitwasyon ang ila kabuhi sa sulod sang presuhan.
Si Llaver ang nahibaluan nga gin-assign sa CRC sadtong tuig- 2016 bilang jail guard apang ini ang na-promote nga administrative officer.
Nahibaluan nga maluwas sa amo nga alegasyon, may yara pa sang isa ka inmate ang nagpalab-ot sang reklamo nga ang asawa sini kag ang nasambitan nga si Llaver ang may yara sang relasyon.
Ginsiling sini nga magaduha na ka tuig nga wala makabisita(dalaw) sa iya ang iya asawa.
Apang may nakalab-ot sa iya nga impormasyon nga masami makit-an nga magkaupod sa guha ang ginareklamo nga si Llaver kag ang iya asawa.
Suno sa alegasyon, nagabusong na sa subong ang iya asawa kag ang ginatudlo amay, amo si Llaver.
Suno sa impormasyon halin sa mga inmates, si Llaver ang ‘matinik’ paglab-ot sa pagdiskarte sa mga asawa sang inmates nga napreso sa amo nga pasilidad.
Natalana nga pagakuhaan sang iya reaksyon ang persona nga ginareklamo samtang pagalab-uton man ang pamunoan ni Jail Warden Arjuna Yngcong sang Capiz Rehabilitation Center angut sa amo nga isyu.

Facebook Comments