Mga Kasambahay sa rehiyon dose may lauman nga dugang P1, 500.00 sa bulanan nga sweldo.

May lauman nga wage adjustmen ang mga kasambahay dire sa rehiyon dose base sa ginpatigayon nga deliberation sang Regional Tripartite Wages and Productivity Board ukon RTWPB 12 sa resulta sang ginpatigayon nga public hearing/ Consultation on Minimum Wage Adjustment for Domestic Workers ukon Kasambahay sa rehiyon sang Martes nga adlaw, Enero 21, 2020.

Base sa ila nga desisyon suno kay RTWPB 12 secretary Jessie dela Cruz nagalab-ot sa P1, 500.00 ang isaka sa bulanan nga sweldo sang mga kasambahay.

May-angot sini, makabaton na sang P4, 000.00 nga sweldo ang mga kasambahay sa syudad kag P3,500.00 sa mga munisipyo sa tion nga mag-epektibo na ang panibag-o nga wage order sa mga kabulig sa balay.


Suno kay Dela Cruz may basehan ang pagdugang sa sweldo sang mga kasambahay tungod ang ginabaton nila sa subong nga P2, 000.00 tubtob P2, 500.00 nga bulanan nga sweldo ang sang Disyembre 2017 pa naaprobahan.

Gintambongan naman sang mga employer kag kasambahay ang nasambit nga public hearing sa diin ginplastar sa mga ini ang mga salient point sang Republic Act 10361 ukon ang Batas Kasambahay kag ginpatigayon man ang survey sa diin ginpamangkot ang mga kabulig sa balay kon may isaka sa sweldo, pila ang luyag sang mga ini nga idugang.

Samtang suno ka Dela Cruz ang wage order ang isubmitir pa sa National Wages and Productivity Board Commission para sa review kag affirmation bag-o ang publication sini sa lokal nga pamantalaan nga magadugay sang kinse ka adlaw.
photo by: DOLE 12

Facebook Comments