MGA MAGTUTUDLO SA LALA, LANAO DEL NORTE, MOSAKAY PA OG PUMPBOAT, MOSAGUBANG SA MGA DAGKUNG BALOD ARON MAHATUD UG MAKUHA ANG MGA LEARNING MODULES SA MGA BATA

(video: RadyoMaN Divina Suson)

Lawom nga dagat ug dagkung mga balod ang sagubangon sa mga magtutudlo sa Darumawang Bucana Elemetary School sa nasangpit nga barangay sa lungsod sa Lala, Lanao del Norte aron lang mahatud ug makuha og balik ang mga learning modules sa mga bata.

  Kini ang nakit-an nga problema sa gihimong distribution sa mga self learning modules (SLM) niadtong Sabado, Oktubre 3.


  Nakuyugan sa mga sakop sa media ang mga magtutudlo sa ilang unang semana sa paghatud sa mga SLM…  

Bisan paman nga makit-an sa ilang mga panagway nga relax lang sila sa maong mga hagit sa ilang trabaho, miingon ang magtutudlo nga si Mary Jane Abulucion, nga nahadlok gihapon sila sa maong sitwasyon kay basin og malunod sila, apan dili nila kini mahimong balibaran tungod kay mao man kini ang ilang trabaho.  

Siguruhon lamang nila, matud pa, nga maputos og plastic aron dili ma-basa ang mga modules.  

Matud pa usab sa laing magtutudlo nga si Rebecca Del Rosario nga bisan paman sa kalisod sa ilang atubangon sa paghatud sa mga SLM ug pag-monitor sa mga bata, ilahang ipakita nga ilang gihimo ang ilang trabaho aron usab madasig ang mga ginikanan nga motabang pinaagi sa pag-giya sa ilang mga anak sa pag-answer sa module.  

Ang Barangay Darumawang Bucana usa ka isla sa lungsod sa Lala diin ang panginabuhian sa mga residente ang pagpangisda. Tungod sa ka-remote sa maong dapit, nagpadayon nga zero case sila sa COVID-19.  

Modagan sa 20 ngadto na sa 30 ka minutos ang biyahe sa pumboat aron makaabot sa maong dapit.  
Gikan sa 267 ka mga pupils o learners niadtong nakalabay’ng school year, aduna nalang kini karon 260 tungod kay mi-gradwar na ang pito.  

Tungod kay bulag-bulag ang lokasyon sa mga balay sa mga learners, kinahanglang sung-on sa mga magtutudlo ang kanipaan ug ang katunggan sakay sa sakayan nga walay katig aron matunol ngadto sa mga bata ang ilang modules.

Facebook Comments